~心靈的花園~

Wednesday, March 07, 2001

波子機入球!!!

終於有得睇波了!!!!! 今晚遇到幾個弟兄話去睇波，反正我已做起條ｅｓｓａｙ，幾歹都跟埋去睇啦!!雖然只是睇電視，但對於ｎ世冇睇過波的我來說，已經係非常滿足！　今晚是曼聯對一隊我完全唔知係乜的球隊(Panathinaikos F.C.)，其實我真係唔係好應該睇，因為我係好邪曼聯的，印象中逢親我睇果場曼聯唔係輸就係和，當我冇睇的時候呢，佢就會好神勇咁勁數波囉=P!　好彩我都唔算係曼聯迷，否則真濕滯>.<！而今晚場波亦都逃不過”宿命”，曼聯的表現真係好差，險些兒輸波；幸好對手亦都係廢下廢下咁，錯失好幾次單挑的入球機會，最後再全靠史高斯係補時兩分鐘的波子機入球追和！！哈哈，雖然場波唔算好好睇，但都算啦，有得睇好過冇=P!
而我今天已經交了這個ｔｅｒｍ最後一份ｅｓｓａｙ了，所以非常輕鬆=)　於是就做了一件又係ｎ世都冇做過的事－一日內練了三個鐘頭鋼琴!!真係好耐未試過，自從冇學琴以來吧.... 個感覺真係太好，彈到對手熱起來，也累了，但卻是不由自主地繼續彈下去.....　我知道如果是在香港這一定冇可能發生；我亦知道就算我怎樣彈都係彈不好，我仍會繼續彈下去.... 或者(應是肯定)我沒有天賦的ｔａｌｅｎｔ，後天的努力也幫不了多少，但我只期望自己能對真心喜歡的事情堅持到底，即使結果是在掌握以外......
隱約記得，好像是足球風雲吧?唔知邊個問了主角一句：你係唔係...真心鍾意足球呀? 我好記得這一句，因為正當那時候我彈琴真係彈到心灰意冷，好想放棄....當睇電視聽到這一句時，好像就在問我一樣：你係唔係.... 真心喜歡音樂?真心喜歡彈琴?..... 那一刻真係哭了起來..... 我知道要放棄是很容易的，但我唔希望自己這樣選擇，我唔希望將來自己個心會責備我輕看了它，辜負了它....
都唔知點解講講下會去番咁多年前的一個片段.... 點都好啦，可以在這裏練番琴真係好好好好好好開開開開開開心心心心心心~~~~~~~~~~~~!!!!!!!!!!!!!!!!!

by jojoju at 7:54 PM |