~心靈的花園~

Wednesday, January 07, 2004

一個八歲小孩的煩惱

前日返二年級主日學時，見到一位平日十分乖既小朋友自己坐埋一邊，仲扁哂嘴，問佢係唔係比其他同學仔蝦？點知佢擰擰頭....咁唔通因為同學仔噪得「滯」，攪到佢聽唔到書所以唔開心？佢又擰擰頭...
咁係咪未食早餐？肚痛？今朝比媽咪鬧？同哥哥嗌交？打交？上堂太悶？統統都唔係....你唔通人仔細細有感情問題？我問﹕「係咪有女仔唔啋你呀？」佢又擰擰頭....我見人多，可能佢唔放心講，就帶佢去一個靜既地方。

問題一﹕究竟主日第三堂時段，康澤邊度有靜既地方？
原來要人分享，真係好重要，人少左，個小朋友終於開口。佢細細聲話﹕「其實我有關於信仰既問題。」

問題二﹕你上次同人分享信仰問題係幾時？
我打左個 ，暗暗求神幫助，因為怕解答不宜會好大鑊。同佢詳細傾，原來佢唔係太清楚自己係咪真係「完全」信主，無唸過一個小小既腦袋會想到咁深。我嘗試將福音再講一遍，小朋友似乎明白，但原來佢覺得一個「完全信主」既人，係應該為神做好多好多事情，而佢就無。我地當然唔可以藉行為一個人是否得救，但小孩子細細個就有呢個心志，實在令人感動。

問題三﹕你對上一次問神﹕『我能為你作什麼？』係幾時？
我於是問佢﹕「咁你有無讀聖經？」「有﹗」「咁祈禱呢？」「有﹗」「咁傳福音呢？」「都有呀，不過唔似彼得佢地一傳就好多人信」我唯有加以安慰，並求神比小朋友有結果子既時候。

問題四﹕如果有人問你以上問題，你既答案會係點？
再傾落去，小朋友暫時未知要為神作何事，只知「要為神做好多好多野」。我同小朋友以祈禱結束左我地既 ，老師們會繼續 ，希望可以幫助佢明白更多。不過同小朋友既對話當中，我有以下反省﹕
一﹑已經好耐無同人分享信仰問題，究竟係因為我已經再無信仰問題，定係我已經唔當信仰問題係一個問題？
二﹑成日淨係問神要呢樣﹑要果樣，有無問返神要咩呢？
三﹑一個唔覺意，我可能教緊個「童年簫牧師」，真係要醒醒定定。 年就由晨更祈禱會開始啦﹗如果各下有幸睇到最未，請為呢位小朋友代禱，求神保守佢呢棵信心既小幼苗能夠札穩根基，快高長大﹗

Labels: 我信故我思

by jojoju at 3:37 PM |